उत्तराखण्डमा हिमपहिरोपछिएको बाढीका कारण ज्यान गुमाउनेको संख्या ५०
भारतको उत्तराखण्डमा हिमपहिरोपछि आएको बाढीका कारण ज्यान गुमाउनेको सङ्ख्या ५० पुगेको छ ।
उत्तराखण्डको चमोली जिल्लाको तपोवन सुरुङमा थप १२ जनाको शव भेटिएसँगै ज्यान गुमाउनेको सङ्ख्या ५० पुगेको भारतीय सञ्चारमाध्यमलाई उद्धृत गर्दै उज्यालो अनलाइनले लेखेको छ । उद्धारकर्ताको टोलीले सुरुङमा फसेकाहरूलाई अझै बचाउने आश रहेको बताएका छन् ।
यस सुरुङमा ३२ जना कामदार अझै पनि फसेको हुन सक्ने आशङ्का गरिएको छ । बाढीमा परेर अझै एक सय ५० भन्दा धेरै हराइरहेको अधिकारीहरूले बताएका छन् । उत्तराखण्डमा गएको माघ २५ गते हिमपहिरोपछि बाढी आएको थियो । बाढीले चार वटा जलविद्युत् आयोजनामा क्षती गर्नुको साथै १३ वटा भन्दा धेरै गाउँमा क्षति पुर्याएको थियो ।
हिमनदी विस्फोटका कारण पुल भत्किएपछि चमोली जिल्लाका १३ गाउँ अलग भएको बताइएको छ । ती गाउँका मानिसहरूलाई उद्धार गर्ने काम भइरहेको सञ्चारमाध्यमले जनाएका छन् । अचानक आउने बाढी पहिरोको उच्च जोखिममा पर्ने पश्चिमी हिमालय क्षेत्रमा रहेको उत्तराखण्डमा सन् २०१३ को जुन महिनामा ठूलो वर्षापछि आएको बाढीका कारण झण्डै ६ हजार मानिसको ज्यान गएको थियो ।
यो पनि पढ्नुहोस्
