कांग्रेस बागमती प्रदेश सभापतिका लागि आज भएको दोस्रो मतदानको मतपरिणाम आउने क्रम जारी

नेपाली कांग्रेस बागमती प्रदेश सभापतिका लागि आज भएको दोस्रो मतदानको मतपरिणाम आउने क्रम जारी छ ।

साँझबाट सुरु भएको मतगणनामा अहिलेसम्म ११०५ मत गनिसक्दा इन्द्रबहादुर बानियाँ ५८१ मत सहित अगाडी हुनुहुन्छ । यस्तै सभापतिका अर्का उम्मेद्वार जगदिश्वर नरसिंह केसीले ५१८ मत प्राप्त गर्नु भएको छ ।

बानियाँ, केसी भन्दा बानियाँ ६३ मतले अघि हुनुहुन्छ । पहिलो चरणको निर्वाचनमा सभापति पदका तीनै उम्मेदवारमध्ये कसैले पनि बहुमत नल्याएपछि कांग्रेस बागमती प्रदेश सभापतिका लागि आइतबार दोस्रो चरणमा मतदान भएको हो ।

आइतबार भएको मतदानमा हिजो भन्दा ५८ मत कम अर्थात २ हजार २५ मत खसेको थियो । जारी अधिवेशनमा २ हजार १ सय ५१ प्रतिनिधि रहेका छन् । यसअघि आज बिहान सभापतिका अर्का उम्मेद्वार भीमसेनदास प्रधानले पत्रकार सम्मेलन गरी बानियाँलाई समर्थन गर्ने घोषणा गर्नु भएको थियो ।